ಕಾವಲು ಸಿಬ್ಬಂದಿಗೆ ಸುಸಜ್ಜಿತ ವಸತಿ, ಬಿಸಿನೀರು, ಗುಣಮಟ್ಟದ ಊಟದ ವ್ಯವಸ್ಥೆ; ಆರೋಗ್ಯ ಕಾಳಜಿಗೆ ವಿಶೇಷ ನಿಗಾ
ಬೆಳಗಾವಿ: ಡಿಸೆಂಬರ್ 3, 2025
ಸುವರ್ಣ ವಿಧಾನಸೌಧದಲ್ಲಿ ಇದೇ ಡಿಸೆಂಬರ್ 8 ರಿಂದ 19 ರವರೆಗೆ ನಡೆಯಲಿರುವ ಚಳಿಗಾಲದ ಅಧಿವೇಶನಕ್ಕೆ ಭದ್ರತಾ ವ್ಯವಸ್ಥೆಯನ್ನು ಭಾರಿ ಪ್ರಮಾಣದಲ್ಲಿ ಬಿಗಿಗೊಳಿಸಲಾಗಿದೆ. ದೆಹಲಿಯಲ್ಲಿ ಇತ್ತೀಚೆಗೆ ನಡೆದ ಬಾಂಬ್ ಸ್ಫೋಟದ ಕೃತ್ಯದ ಹಿನ್ನೆಲೆಯಲ್ಲಿ ಈ ಬಾರಿ ಭದ್ರತೆಗೆ ವಿಶೇಷ ಒತ್ತು ನೀಡಲಾಗಿದ್ದು, ಸುಮಾರು 6,000 ಪೊಲೀಸರನ್ನು ನಿಯೋಜಿಸಲು ಸಿದ್ಧತೆ ನಡೆದಿದೆ. ಭದ್ರತಾ ಮೇಲ್ವಿಚಾರಣೆಗೆ ಈ ಬಾರಿ ಮೊದಲ ಬಾರಿಗೆ 11 ಡ್ರೋನ್ಗಳನ್ನು ಬಳಸಲಾಗುತ್ತಿದ್ದು, ಇದು ಭದ್ರತಾ ವ್ಯವಸ್ಥೆಯಲ್ಲಿನ ಪ್ರಮುಖ ಬದಲಾವಣೆಯಾಗಿದೆ. ಈ ವ್ಯವಸ್ಥೆಗೆ ಪೊಲೀಸ್ ಇಲಾಖೆಯು ಸುಮಾರು ₹5 ಕೋಟಿ ವೆಚ್ಚ ತಗುಲಬಹುದು ಎಂದು ಅಂದಾಜಿಸಿದೆ.
*ಚಳಿಗಾಲದ ಸವಾಲು: ಪೊಲೀಸರ ಆರೋಗ್ಯಕ್ಕೆ ವಿಶೇಷ ಕಾಳಜಿ*
ಅಧಿವೇಶನ ನಡೆಯುವ ವೇಳೆಗೆ ಬೆಳಗಾವಿಯಲ್ಲಿ ಕನಿಷ್ಠ ಉಷ್ಣಾಂಶವು 14 ಡಿಗ್ರಿ ಸೆಲ್ಸಿಯಸ್ನಿಂದ 12 ಡಿಗ್ರಿಯವರೆಗೆ ಇಳಿಯುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಈ ಮೈ ಕೊರೆಯುವ ಚಳಿಯಿಂದ ಸಿಬ್ಬಂದಿಯ ಆರೋಗ್ಯದಲ್ಲಿ ಏರುಪೇರಾಗುವ ತಕರಾರು ಪ್ರತಿ ವರ್ಷ ಕೇಳಿಬರುತ್ತಿದ್ದವು. ಈ ಹಿನ್ನೆಲೆಯಲ್ಲಿ ಈ ಬಾರಿ ನಿಯೋಜಿತ ಸಿಬ್ಬಂದಿಯ ಆರೋಗ್ಯ ರಕ್ಷಣೆಗೆ ಮತ್ತು ಅವರಿಗೆ ಗುಣಮಟ್ಟದ ಸೌಲಭ್ಯ ಒದಗಿಸಲು ವಿಶೇಷ ಗಮನ ನೀಡಲಾಗಿದೆ.
ಡಿ ಐ ಜಿ ಬಸವರಾಜ್ ಜಿಳ್ಳೆ ಅವರು ಮಾತನಾಡಿ, “ಪೊಲೀಸ್ ಸಿಬ್ಬಂದಿಯ ವಸತಿ, ಊಟ, ನೀರು, ಭದ್ರತೆ, ಆರೋಗ್ಯ ಮತ್ತು ಸಾರಿಗೆ ಎಲ್ಲದರ ಬಗ್ಗೆ ವೆಚ್ಚ ಅಂದಾಜಿಸಿ ಸಲ್ಲಿಸಲಾಗಿದೆ. ಕಳೆದ ವರ್ಷ ನೀಡಿದ ಎಲ್ಲ ಅನುಕೂಲಗಳು ಈಗಲೂ ಮುಂದುವರಿಯಲಿವೆ,” ಎಂದು ಭರವಸೆ ನೀಡಿದರು.
*ಟೆಂಟ್ ಸಿಟಿ: 2,500 ಸಿಬ್ಬಂದಿಗೆ ‘ಸುರಕ್ಷಿತ ವಸತಿ’*
* ವಸತಿ ವ್ಯವಸ್ಥೆ: ಪೊಲೀಸ್ ವಸತಿ ಗೃಹಗಳು, ಚೈತನ್ಯ ಬ್ಯಾರಕ್, ಕಾರ್ಮಿಕ ಭವನ ಸೇರಿ ಒಟ್ಟು ಆರು ಕಡೆ ವಸತಿ ವ್ಯವಸ್ಥೆ ಮಾಡಲಾಗಿದೆ.
*ಶಿಂಧೊಳ್ಳಿ ‘ಟೆಂಟ್ ಸಿಟಿ’:*
ಮುಖ್ಯವಾಗಿ, ಸುವರ್ಣ ವಿಧಾನಸೌಧ ಬಳಿಯ ಶಿಂಧೊಳ್ಳಿ ಗ್ರಾಮದ ಗುಡ್ಡದಲ್ಲಿ ‘ಟೆಂಟ್ ಸಿಟಿ’ ನಿರ್ಮಿಸಲಾಗುತ್ತಿದ್ದು, ಇಲ್ಲಿ 2,500 ಸಿಬ್ಬಂದಿಗೆ ವಸತಿ ಕಲ್ಪಿಸಲಾಗುತ್ತದೆ.
*ಚಳಿಗೆ ಪರಿಹಾರ:*
ಗುಡ್ಡದ ಮೇಲೆ ಬೀಸುವ ಶೀತಗಾಳಿಯಿಂದ ರಕ್ಷಣೆಗಾಗಿ ಇಲ್ಲಿ ಮಂಚ, ಗಾದಿ ಮತ್ತು ಬೆಡ್ಶೀಟ್ಗಳನ್ನು ಒದಗಿಸಲಾಗುವುದು.
*ಸ್ವಚ್ಛತೆ ಮತ್ತು ಮೂಲಭೂತ ಸೌಕರ್ಯ:*
ಶುದ್ಧ ಕುಡಿಯುವ ನೀರಿನ ಘಟಕ ಮತ್ತು ಸ್ನಾನಕ್ಕೆ ಬಿಸಿನೀರು ವ್ಯವಸ್ಥೆ ಕಲ್ಪಿಸಲು ಸಿಲಿಂಡರ್ ಒಲೆಗಳು ಹಾಗೂ ದೊಡ್ಡ ಪಾತ್ರೆಗಳನ್ನು ತರಿಸಲಾಗಿದೆ.
*ಸೌಕರ್ಯಗಳು:*
ಸೊಳ್ಳೆಗಳ ಕಾಟ ತಪ್ಪಿಸಲು ಸೊಳ್ಳೆಬತ್ತಿ, ಮನರಂಜನೆಗೆ ಸಂಗೀತ ಪರಿಕರ, ಟಿ.ವಿ ಸೌಲಭ್ಯ, ಮೊಬೈಲ್ ಚಾರ್ಜರ್ ಮತ್ತು ಪ್ಯಾನ್ ವ್ಯವಸ್ಥೆ ಇರಲಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
*ಡ್ರೋನ್ ಮತ್ತು ಉನ್ನತ ಅಧಿಕಾರಿಗಳ ಮೇಲುಸ್ತುವಾರಿ*
* ಭದ್ರತಾ ತಂಡ: ಒಟ್ಟು 6 ಐಪಿಎಸ್ ಅಧಿಕಾರಿಗಳು ಸೇರಿ 16 ಅಧಿಕಾರಿಗಳು ಭದ್ರತೆ ಮೇಲುಸ್ತುವಾರಿ ವಹಿಸಲಿದ್ದಾರೆ.
* ತಾಂತ್ರಿಕ ನೆರವು: ಶ್ವಾನದಳ ಮತ್ತು ಬಾಂಬ್ ಪತ್ತೆ ತಂಡಗಳು ಸಿದ್ಧವಾಗಿರಲಿವೆ. ಹೊಸದಾಗಿ 11 ಡ್ರೋನ್ಗಳನ್ನು ಭದ್ರತಾ ಕಣ್ಗಾವಲಿಗೆ ಬಳಸಲಾಗುತ್ತಿದೆ.
* ಗುಣಮಟ್ಟದ ಕರ್ತವ್ಯ: ಡಿಸಿಪಿ ನಾರಾಯಣ ಭರಮನಿ ಅವರು, “ಸಿಬ್ಬಂದಿ ಶಿಸ್ತು ಮತ್ತು ದಕ್ಷತೆಯಿಂದ ಕಾರ್ಯನಿರ್ವಹಿಸಲು ಗುಣಮಟ್ಟದ ಊಟ, ನೆಮ್ಮದಿಯ ನಿದ್ದೆಗೆ ಬೇಕಾದ ಸೌಲಭ್ಯಗಳನ್ನು ನೀಡಲಾಗುವುದು,” ಎಂದು ತಿಳಿಸಿದರು.
ಜಿಲ್ಲಾಧಿಕಾರಿ ಮೊಹಮ್ಮದ್ ರೋಷನ್ ಅವರ ಪ್ರಕಾರ, ಪೊಲೀಸ್ ಸಿಬ್ಬಂದಿಯ ವಸತಿ, ಊಟ, ನೀರು, ಭದ್ರತೆ, ಆರೋಗ್ಯ ಮತ್ತು ಸಾರಿಗೆ ಎಲ್ಲದರ ಬಗ್ಗೆ ವೆಚ್ಚ ಅಂದಾಜಿಸಿ ಸಲ್ಲಿಸಲಾಗಿದೆ.
